Follow by Email

حدوته جيل


في ليله سرحت بخيالى في التوهــان
لقيت حمزة حبيب خالتو جاي زعلان
بيقولي احكيلي حدوته عشان زهقـان
اخدته في حضني وقلت كان ياما كان


كان في بلد جميله مذكورة في القرآن
بلد الأصالة والكرامة وبلـد فرسـان
وفي يوم حكمها عسكر للأمانة خان
باع كل خيرها لليـهود والأمريكـان


مرت سنين وزاد ظلمه كمان وكمان
جـه يوم عنيد إتوحدوا فيه الفرسـان
ونـزلوا معـاهم بنـات كتيـر جدعـان
اتجمعـوا في دايـره اسمهـا المــيدان


 خـلعوا بـسرعـة رئيسهم الثعبـان
بس العسكر المكار عمل فرحـان
قال أنا معاكم وبحميكم يا شجعان
وقدم تحيه قويه لشهيد كل ميـدان


وفي المتحف دوق الناس عذاب ألوان
منهم الأميرة سميرة ست الجدعــان
بنت الصعيد الحـرة رفضت الهوان
وحلفـت تاخد تارها من كـل جبــان


قالو للشعب روح بيتك انت ونـام
واحنا هنا عشان نحققلك الاحــلام
كانت وعودهم كلها كلام في كلام
وحكموا على حرية الرأي بالإعدام


حبسو الفرسان من تاني زي زمان
لقوا نقوش الظلم لسه على الجدران
فرجعوا الشباب من تـاني للـمـيدان
عشـان يخلـصوا بلدهم من الطغيـان


وكـالعـــادة بـاعـوهـم الإخـــوان
عشـان يلحقـوا كـرسي البرلمان
مهو الجـدع جـدع والجبـان جبان
ومكان الجدع هناك في الميـدان


في شارع الحرية بيناضلوا الفرسان
بين رصاص وخرطوش وغاز ودخان
حراره ده فارس فقد عين والثانية كمان
قال كلي فدى بلادي ومش حعيش مهان



واحمد شهيد غالي مصيره في الزبالة كان
على إيد ابن بلده مش صهاينه ولا امريكان
فاكرين حيخلدوا فيها ده كل من عليها فان
المجد للشــهـــداء والعــارعـلى اللي خــان



طلع نهار جديد وسقط عسكر الجرذان
ورد الجناين فتح وملى الحيـاه الــوان
 وعاشوا فيها ولادهم في سلام وأمان
يهتفوا مصر حره واشهد بقا يا زمان
 J

العصفور أولاً !!!!


زادت همومي وحاولت مراراً أن أفرغها بكلمات على الأوراق ولكن لم استطع ..... ماذا اكتب !! فلم تعد الكلمات قادرة على الخروج بعد أن  تملكني الحزن واليأس ... ماذا ستفعل الكلمة وهي محبوسة في قفص ومسلسله بالجنازير؟

ما جعلني أتراجع وأقرر الكتابة الآن هو عصفور صغير .... نعم كان عصفور ولكن !!!!!
في صباح اليوم كالمعتاد خرجت من بيتي في عجالة وركبت سيارتي بسرعة متجهه لمكان عملي وفجأة إعترض طريقي عصفور صغير فأوقفت السيارة فوراً وقلت العصفور أولا ً.... ولكنه لم يتحرك !! وفي هذه الثواني تراكمت عدد من السيارات خلفي  وبدأت تتعالى ضجيج ألآت الإنذار ، أعلم أنهم متأخرين مثلي ولكن كيف لي أن أتحرك وأدهس هذه الروح تحت عجلات سيارتي عن عمد !!! وإلى أين سوف اهرب من عذاب ضميري ان فعلت ذلك ؟

هنا قرر العصفور الطيران محلقا في الجو بجناحه الصغيرين وانأ أتابعه بتنهيده حزينة وقلت في نفسي كم أتمنى أن  أطير مثلك حره في سماء بلادي .....

انطلقت في طريقي وأنا أفكر طوال الوقت كيف استطاع الجيش أن يدهس أرواح كل هؤلاء البشر تحت عجلات مدرعاته؟؟  كيف جعل من أجسادهم مطبات بشريه يتحرك فوقها دون رحمه أو شفقه ؟؟ كيف خلدوا إلى النوم واستطاعوا الهروب من عذاب الضمير ؟؟ هل كانوا بلا ضمير من البداية وختم الله على قلوبهم؟ أم أن دم المصري مازال رخيصاً داخل وخارج وطنه ؟ أم لأنهم لم يؤمنوا بالثورة حتى الآن وكل ما قالوه لنا أشعار في بيانات ليس إلا !!   

أعترف أننا إرتكبنا العديد من الأخطاء في حق ثورتنا جعلتهم يتمادون في تجاوزاتهم ولكن ليس لدرجة كفرهم بالثورة نفسها ...نعم لقد كفروا بها ويريدون أن يجعلونا نكفر بها نحن أيضا وتجاوزوا كل الحدود الممكنه

لقد عاد أمن الدولة في زيه  الجديد ليخطف الدكتور احمد عاطف بطريقته الغير آدميه وجعل قلب أمه يحترق ستة أيام متواصلة بدون أي أخبار عن ابنها لأنه سعى وراء مطالب مشروعه تكفل للطبيب حياه كريمه ليس أكثر !!

كم هو شعور قاسي عندما نرى رجل ينكسر وفي عينيه دموع حارقه يقاومها حتى لا تنهمر فتحرق رجولته ..... هذا المشهد رأيته أيضاً لشاب يدعى ( زيكو ) بعد الإفراج عنه في أحداث المنطقة الشمالية بدأ يحكي لي ما فعله به العسكر وكله مرارة وألم نفسي أكبر مما يعانيه من الآم جسديه رغم ضربه وتكسير سنته الأمامية وكان يهرب بنظراته التي ملأتها الدموع قائلاً لي أنا أتكسرت يا إيمان .......

بالأمس رأيت نفس هذه النظرة عندما قال احمد عاطف على التلفاز أنا انكسرت بتهديداتهم ليا  .... لقد هددوه بأمه و اخواته البنات إن لم يلتزم بتعليماتهم وشعرت أن كلماته تحمل في طياتها نبره من اليأس والألم .....أهذا ما يريد أن يوصلنا إليه جيشنا العظيم حامي الشعب والثوره !!

اقسم أني فخوره بهذه الشموع التي تحترق لكي تنير ظلام مصر الحالك ....هم رجال ليسوا كغيرهم من رجال الأحزاب اللذين سيلعنهم التاريخ لتوقيعهم على تسليم مصر في أيدي المجلس العسكري   

رغم كل هذه المرارة التي عيشنا فيها العسكر من محاكمات عسكريه وطوارئ ودهس للمتظاهرين إلا انه لم يستوعب أن الشعب هو الخط الأحمر .... أن الشعب هو الحقيقه الوحيده الباقيه على أرض مصر ..... واننا جيل عنيد لا يقبل ان يعود للذل والمهانه والدهس والمعايره من جديد بعد ان ذقنا حلاوه الحريه ....وانه سيحاكم مثل المخلوع ان لم يحاسب المسؤول ؟؟

لم يعد أمامنا خيار اخر الا ان نكمل طريقنا مهما كانت الخسائر ..... أما آن الأوان يا مصر أن نحلق في سماء الحرية مثل هذا العصفور الصغير  ، وان نغرد بأصوات عاليه لا تمنعها حكومات ولا سلطات ؟؟ وان نلمس نور الأمل بأيدينا بعد طول انتظار ...نعم لدينا الكثير والكثير لنقدمه  حتى نصل بك الى بر الأمان ....

مـــازلـــت متـفــائــلــة 




كــلــمــه للـتــاريــخ .... طنطاوي مشافش حاجه





س١ : حصل اجتماع يوم 22 يناير، هل ورد إلي رئيس الجمهورية السابق ما دار في هذا الاجتماع وما أسفر عنه وما كان مردوده ؟
ج1 : الاجتماع كان برئاسة رئيس الوزراء واعتقد أنه بُلّغ

س2 : بداية من أحداث 25 يناير وحتي 11 فبراير هل تم اجتماع بينك وبين الرئيس السابق حسني مبارك ؟
ج2 : ليست اجتماعات مباشرة ولكن يوم 28 يناير لما أخذنا الأمر من السيد رئيس الجمهورية كان هناك اتصالات بيني وبين السيد الرئيس. 

س3: ما الذي أبداه رئيس الجمهورية في هذه اللقاءءات ؟
 ج3: اللقاءات بيننا كانت تتم لمعرفة موقف القوات المسلحة خاصة يوم 28 وعندما كلفت القوات المسلحة للنزول للبلد ومساعدة الشرطة لتنفيذ مهامها,
كان هناك تخطيط مسبق للقوات المسلحة وهذا التخطيط يهدف لنزول القوات المسلحة مع الشرطة وهذه الخطة تتدرب عليها القوات المسلحة,
القوات المسلحة بتنزل لما الشرطة بتكون محتاجة المساعدة وعدم قدرتها علي تنفيذ مهامها وأعطي الرئيس الأمر لقائد القوات المسلحة بنزول القوات المسلحة لتأمين المنشآت الحيوية وهذا ما حدث. 

س4 : هل وجه رئيس الجمهورية السابق المتهم محمد حسني مبارك أوامر إلي وزير الداخلية حبيب العادلي باستعمال قوات الشرطة القوة ضد المتظاهرين بما فيها استخدام الاسلحة الخرطوش والنارية من 25 يناير حتي 28 يناير ؟
ج4 : ليس لدي معلومات عن هذا واعتقد ان هذا لم يحدث

س5 : هل ترك رئيس الجمهورية السابق للمتهمين المذكورين من أساليب لمواجهة الموقف ؟
ج5 : ليس لدي معلومات 

س6: هل ورد أو وصل إلي علم سيادتك معلومات أو تقارير عن كيفية معاملة رجال الشرطة ؟
ج6 : هذا ما يخص الشرطة وتدريبها ولكني أعلم ان فض المظاهرات بدون استخدام النيران 

س7 : هل رصدت الجهات المعنية بالقوات المسلحة وجود قناصة استعانت بها قوات الشرطة في الأحداث التي جرت؟
ج7 : ليس لدي معلومات

س8 : تبين من التحقيقات إصابة ووفاة العديد من المتظاهرين بطلقات خرطوش أحدثت إصابات ووفيات..هل وصل ذلك الأمر لعلم سيادتك وبم تفسر ؟
ج8: إنا معنديش معلومات بكده.. الاحتمالات كتير لكن مفيش معلومة عندي

س9 : هل تعد قوات الشرطة بمفردها هي المسئولة دون غيرها عن إحداث إصابات ووفيات بعض المتظاهرين ؟
ج9 : إنا معرفش ايه اللي حصل 

س10 : هل تستطيع سيادتك تحديد هل كانت هناك عناصر أخري تدخلت ؟
ج10 : هيا معلومات غير مؤكدة بس اعتقد ان هناك عناصر تدخلت 

س11 : وما هي تلك العناصر ؟
ج11 : ممكن تكون عناصر خارجة عن القانون

س12 : هل ورد لمعلومات سيادتك ان هناك عناصر اجنبية قد تدخلت ؟
ج12 : ليس لدي معلومات مؤكدة ولكن ده احتمال موجود 

س13 : وعلي وجه العموم هل يتدخل الرئيس وفقا لسلطته في ان يحافظ علي أمن وسلامة الوطن في إصدار أوامر أو تكليفات في كيفية التعامل ؟

ج13 : رئيس الجمهورية ممكن يكون أصدر أوامر - طبعا من حقه ولكن كل شئ له تقييده المسبق وكل واحد عارف مهامه 

س14 : ولمن يصدر رئيس الجمهورية علي وجه العموم هذه الأوامر ؟
ج 14 : التكليفات معروف مين ينفذها ولكن من الممكن ان رئيس الجمهورية يعطي تكليفات مفيش شك

س15 : وهل يجب قطعا علي من تلقي أمر تنفيذه مهما كانت العواقب ؟
ج15 : طبعا يتم النقاش والمنفذ يتناقش مع رئيس الجمهورية وإذا كانت الأوامر مصيرية لازم يناقشه

س16: هل يعد رئيس الجمهورية السابق المتهم محمد حسني مبارك مسئول مسئولية مباشرة أو منفردة مع من نفذ أمر التعامل مع ألمتظاهرين الصادر منه شخصيا ؟
ج16 : إذا كان أصدر هذا الأمر وهو التعامل باستخدام النيران أنا اعتقد ان المسئولية تكون مشتركة وأنا معرفش ان كان أعطي هذا الأمر أم لا.    

س17: وهل تعلم ان رئيس الجمهورية السابق كان علي علم من مصادره بقتل المتظاهرين ؟
ج17: يسأل في ذلك مساعديه الذين ابلغوه هل هو علي علم أم لا

س18: وهل تعلم سيادتكم أن رئيس الجمهورية السابق قد تدخل بأي صورة كانت لوقف نزيف المصابين ؟
ج18 : اعتقد انه تدخل وأعطي قرار بالتحقيق فيما حدث وعملية القتل وطلب تقرير وهذه معلومات 

س19: هل تستطيع علي سبيل القطع والجزم واليقين تحديد مدي مسئولية رئيس الجمهورية السابق عن التداعيات التي أدت إلي إصابة وقتل المتظاهرين ؟
ج19 : هذه مسئولية جهات التحقيق 

س20: هل يحق وفقاً لخبرة سيادتكم أن يتخذ وزير الداخلية وعلي وجه العموم ما يراه هو منفرداً من اجراءات ووسائل وخطط لمواجهة التظاهرات دون العرض علي رئيس الجمهورية ؟
 ج20: اتخاذ الإجراءات تكون مخططة ومعروف لدي الكل في وزارة الداخلية ولكن في جميع الحالات يعطيه خبر بما يخص المظاهرات ولكن التظاهر وفضه هي خطة وتدريب موجود في وزارة الداخلية.

س21 : وهل اتخذ حبيب العادلي قرار مواجهة التظاهر بما نجم عنه من إصابات ووفيات بمفرده بمساعدة المتهمين الاخرين في  الدعوى المنظورة وذلك من منظور ما وصل لعلم سيادتك ؟
 ج 21 : معنديش علم بذلك

س22 : علي فرض إذا ما وصلك تداعيات التظاهرات يوم 28 يناير إلي استخدام قوات الشرطة آليات مثل إطلاق مقذوفات نارية أو استخدام السيارت لدهس المتظاهرين..هل كان أمر استعمالها يصدر من حبيب العادلى يصدر من حبيب العادلى ومساعديه بمفردهم ؟
ج 22 : ما أقدرش أحدد اللي حصل أيه ولكن ممكن هو اللى اتخذها وأنا ما أعرفش واللى اتخذها مسئول عنها

س23: هل يصدق القول تحديداً وبما لا يدع مجالاً للشك أو الريبة أن رئيس الجمهورية السابق لا يعلم شيئاً أو معلومات أيا كانت عن تعامل الشرطة بمختلف قواتها أو أنه لم يوجه إلى الأول سمة أوامر أو تعليمات بشأن التعامل والغرض أنه هو الموكل إليه شئون مصر والحفاظ على أمنها ؟
ج23 : أنا ما أعرفش اللى حصل أيه لكن أعتقد إن وزير الداخلية بيبلغ وممكن ما يكونش مش عارف بس أنا ما أعرفش

س24 : هل هناك اصابات أو وفيات لضباط الجيش ؟
ج 24 : نعم هناك شهداءس25 : هل تعاون وزير الداخلية مع القوات المسلحة لتأمين المظاهرات ؟
ج 25 : لأ

س26 : هل أبلغت بفقد ذخائر خاصة بالقوات المسلحة؟
ج26: مفيش حاجة ضاعت لكن هناك بعض الخسائر في المعدات واتصلحت ومفيش مشكلة

س27: هل أبلغت بدخول عناصر من حماس أو حزب الله عبر الأنفاق أو غيرها لإحداث إضرابات ؟
ج27 : هذا الموضوع لم يحدث أثناء المظاهرات واحنا بنقاوم الموضوع ده واللي بنكتشفه بندمره وإذا كان فيه حد محول لمحكمة فهذا ليس أثناء المظاهرات.

س28: هل تم القبض على عناصر أجنبية في ميدان التحرير وتم إحالتهم للنيابة العسكرية ؟
ج28: لا ..لم يتم القاء القبض على أى أحد

س29: فى الاجتماع الذي تم يوم 20 يناير هل تم اتخاذ قرار بقطع الاتصالات؟
ج29 : لم يحدث

س30: بعض اللواءات قالوا طلب منا فض المظاهرات بالقوة..هل طلب من القوات المسلحة التدخل لذلك ؟
ج30: أنا قلت فى كلية الشرطة في تخريج الدفعة إن أنا بأقول للتاريخ إن أي أحد من القوات المسلحة لن يستخدم النيران ضد الشعب

الأحرار


رأيت نـور وجـهـك سـاطـع  بين كل الأقمــار
مـع ابتـسـامة يـداعـبهـا الأمــل فـي الـنهــار

لم يكن عشقك ممنوع ولولاه ما كتبت الأشعـار
لا ادري الى أيــن سـنذهـب فلا نمـلك الأقـــدار 

الآن انتـهت مسـرحيـه  الخيانه ونـزل الستـار
كيف استغلوا اسمك في الدعوة لبعض الأفكـار

والحكم على من عارضهم بالكفر ودخول النـار
لن نقبل يوما أن نبقى كالوردة وسـط الإعصـار

نحن لا نؤمن بثــوره تقف في نصف المـشـوار
من يرضى بحلـول وسطى ما بين الجنة والنـار

سنقاوم من ركب في بحرك سفينة عرضها أمتار
وسنظل  يـا مصـر نسبـح من أجـلك ضـد التيـار

اقـتـرب ربيعـك الزاهـي وسـتتفـتح كــل الأزهـار
ونـحـتفـل ينـايـر القـادم بثورتنـا تحت الأمطـار

نحـن ثــوارك قررنـا ولــن نــرجع فـي الـقــرار
فإمـا المــوت على صـدرك أو أن نـعيش أحـرار

سلامات يا حكومه


في البدايه حبيت أمسي على حكومتنا الغاليه وأقول سلامات يا حكومه يا اللي عيزه استقرار بلدنا من شرقها ل غربها .... سلامات يا حكومة يا حنينه على الغلبان  وبتصرفي المعاشات في وقتها ...... سلامات يا حكومه ياللي بتقتلي ثوارك البلطجيه قبل ما يخربوها ويقعدو على تلها ........ سلامات يا حكومه يا اللي بتصالحي أم  الشهيد بالديه وكأنها هديه من ابنها  

ومبروك البراءه لكل رجل طاهر وحيفضل طول عمره طاهر .....مبروك للفقي وغالي وفضلي والمغربي وعقبالك يا ريس ...... أيوه بقول يا ريس مهو لسه مشرفنا بس راح يصيف وسلم الراية عشان يواصل حدوته ابو الفساد

عملنا ثورة هزت العالم وعلمناهم يعني ايه سلميه وحريه وكرامه ولكن في مصر بس ممكن تلاقي ثوره تبهر العالم كله ومتعترفش بيها داخليتنا ولا حكومتنا .....سلامات يا حكومه

قلنا تغيير وادينا غيرنا  .... شيلنا مبارك وجيبنا مشير...... شيلنا نظيف وجيبنا شرف  ....شيلنا العادلي وجيبنا العيسوي  ، ده حتى الداخليه بدأت تتغير وظهر فيها راقصه لولبيه متعدده المواهب بترقص بالسيوف مكانتش موجوده قبل الثوره... من القسم للكباريه ومن الكباريه للقسم

لكن الحق يقال لسه كلاب الداخليه متغيروش وشفت ده في فيديو حرب الداخليه مع الثوار لدرجه اني لما شفت الفيديو بصيت في التاريخ كويس لأني شكيت ان المشاهد دي تكون قبل الثوره وقلت مستحيل تكون بعد 25 يناير بس للأسف كانت هي دي الحقيقه !!!

يعني ايه نعمل ثوره في عيد الشرطه ويبقى لسه في تجاوزات وتعذيب من الشرطه ..... يبقى التكرار يعلم الحمار ولازم ننزل تاني عشان يتعلمو الدرس
 والجديد ان المرادي الانتهاكات عليها عرض مغري .... الداخليه وعليها الشرطه العسكريه هديه حتى اسألوا لؤي نجاتي واللي معاه لأنهم جربو العرض ده ولقو نفسهم واقعين في عصابه وبيتسلمو تسليم اهالي

لؤي نجاتي كل اللي عمله إنه صور إنتهاكات الشرطة زي أي حد فينا وكان مصيره التعذيب هو واللي معاه ومنهم طفل عمره 16 سنه ميستحملش ألم منهم ومع ذلك مترحمش ...... تعذيب ؟! تااااني ؟! أمال ثوره ايه اللي عملناها ؟؟ وحقوق إنسان إيه اللي بنطالب بيها ؟؟ سلامات يا حكومه 

ليا صديق صحفي لما لقاني بحب التصوير والنشر من خلال الصحافه الإلكترونيه عرض عليا يطلعلي كارنيه صحافه وينشر شغلي في المجله وقالي الكارنيه حينفعك في أي مكان ...... بس انا رفضت وقلتله اني مستقله وان زمن الكارنيه انتهي ومش عيزه الكارنيه هو اللي يحميني بعد ما عملنا ثوره ولما رجعت البيت عرفت اللي حصل ل لؤى لما الظابط سأله انت صحفي يلا ؟؟ ولما قاله لا اتضرب واتعذب وكان ممكن كارنيه زي ده يحميه منهم .....الله ؟! يعني احنا لسه في زمن الكارنيه اهو ... وانا وانت واي حد فينا ممكن يحصله اللي حصل ل لؤي وهو بيصور ... سلامات يا حكومه


الثوره بدأت ومكنش صح نسيب الميدان بس لسه اللجام في ايدينا وحنرجع نعتصم زي ما بدأناها ب اعتصام وحنرجع نقول عيش حريه كرامه إنسانيه ...... ومحدش حيقول الدستور أولا ولا الانتخابات أولا ولكن ..... مـــــصــر أولا
 وكفايه كده على الحكومه

مصر اذا قامت !!!

تأملت عيناي سحرك يا مصر من هنـا                وتمنيت أن أرتمى في حضنك وأدمـع
مـن كـان مـصرى الدمـاء قـد انتـمـى                  للفــخر دومـاً وتراه كالنـجـوم يــلمـع


مـن ذا الـذي يحـاول اطفـاء نـورك                     يـا شمس تـضئ الكـون حيــن تطلـع 
هنا احمد ومينا لك قدموا ارواحهم                     فمـن لنـار الفـتنـه فيــك مولـع  !!!

بـأي حــــــق يـا شــقـي ضررتـــها                     إن المــضر لـمصــرنــا لا يـنـفــــع
وسعوا علينا دائره الهموم ووسعوا                     ستجدون دائره الميدان هي الأوسع

سنعود لشوارعك بالتفاؤل في دمانـا                   فــلـن نقبل الـذل مجـددا ولـن نركـع
حاملين صـور شـهـدائك في ذكرانــا                    فـهـم لألـئ على رؤوسنــا تـرصــع 

اقسمنا بمن خلق قلوبنا بعشقك تولع                 ان نكـون سيـفاً لأيـدي الفـاسد مقطـع
مصـــر اذا قــامت تقــوم لهـا الدنـــا                  مصـــر اذا امــرت تــطـاع وتـسمـــع




المجلس والخط الأحمر !!!!

في بدايه كلامي أحب أأكد إن مفيش حاجه اسمها المجلس العسكري خط احمر ، خط احمر على حساب مين ؟؟ على حساب مصر !!!!!!! لأ معلش يا مجلس انا صحيح بحبك بس مش اكتر من مــــصـــر 

انا معرفتش خط احمر في الثوره دي غير دم الشهداء اللي سال في كل محافظات مصر عشان احنا نعيش بكرامه ونحقق اهداف ثورتنا ..عيش ....حريه ....كرامه ....انسانيه  وانت عداك العيب يا مجلس وتعالى نمسك وحده وحده 

اذا كان على العيش اهو مرمي في كل حته والناس بتلعب بالدقيق في الشارع من كتره وعربيات رايحه محمله وعربيات جايه محمله والخير كتير والحمد لله وموضوع حد ادنى وحد اقصى للأجور ملهوش اي لازمه ، مهو كل ده حيتشال من جيوب رجال الأعمال الدافيانه وبعدين مهي الناس كانت عايشه ايام مبارك ومحدش مات من الجوع وعلى رأي المخلوع ...يا رااااجل كبر مخك !!


واذا كان على الحريه بقى ف النااس اصلا فاهمه الحريه غلط ...معنى الحريه انك تعمل اللي بتحبه من غير ما تأذي غيرك لكن لما واحد يجي يكتب مدونه يعري فيها المجلس وينتقده ويطلع المستخبي يبقى يعتقل احسن ومش عيزين وجع دماغ بقا ونفس الكلام يمشي على الإعلام واللي يزعج المجلس يضيع فرحته بالكرسي الجديد يبقى يتجاب من لغاليغو ويتخرس خالص


اما الكرامه دي بقا يا سيدي لعبتك انت ومبدأك فيها زي الفل وبتدي المواطن برستيجه في الشارع وتاخده منه في المتحف المصري بس سؤال محيرني ....الداخليه كان مبدأها اضرب ومتعلمش انت بتضرب وتعلم ليه بقاااااااا ؟؟؟

اما في الجانب الانساني مفيش اطيب من قلبك وطمرت فيك تربيه مبارك ومهانش عليك توديه طره ولا تودي سوزان القناطر واهو تفرقعلك كام بالونه و تلهيهم بكام مليون وتخلي باقي المليارات وقت زنقه ...... ده انت قلبك كبييييييييير ومطاوعاكش تسيب الفاسدين في  طره اكتر من كده هي الناس دي ايه معندهاش رحمه ؟؟؟
وبعدين قتله المتظاهرين دول يتحاكموا ليه يعني هو مش الموت علينا حق ؟؟ والحي ابقى من الميت بقا والناس حتنسى الشهدا ... كويس اصلا انك مندخلتش في يوم موقعه الجمل ووقفت تتفرج ، ما ينوب المخلص الا تقطيع هدومه 

فوووووووووووق .... الشعب هو اللي شال مبارك بجبروته والشرعيه معاه لوحده وبدون اي استفتاء وهو برده اللي مش حيسمح ان الثور تتسرق منه  ويضيع دم الي مات واللي اتعمي واللي اتصاب ، والخط الأحمر ده احنا اللي حطيناه بإيدنا لما سكتنا لمبارك سنين طويله عن حقنا ومستحيل نرجع الخط ده بعد اتنفسنا الحريه 


يوم 27 مايو نازلين عشان بنكره الخوف لأنه احساس بشع ومؤلم للنفس البشريه ومع ذلك لسه بيحاربونا بيه خــاف من البلطجيه .....خـــاف من انهيار الإقتصاد ......خــــاف من ثوره الجياع ......خــــاف من الفتنه الطائفيه ......خـــــاف على اهلك من الإنفلات الأمني ...... خـــــاف من اسرائيل حتضربنا ......خـــــــاف تنتقد المجلس ليعتقلوك ........ خـــــاف تقول كلمه حق بجرأه في الاعلام ....... خــــــاف تقول للدستور لأ عشان الماده التانيه او تقول نعم فالإخوان ياكلوك وطلعنا بنلعب الماتش من غير كوره في الاخر....... خــــــاف على نفسك يوم 27 عشان لو نزلت حنعتبرك مخرب ومشاغب ...... خاف تطالب بحبس مبارك عشان في اللي استلم منه الرايه ومكمل السباق 

عشان كل اللي  فات ده  انزل يوم 27 / مايو واوعى تخاف غير على مــــصـــر  

بالأحضان يا مصر



بالأحضان يا مصر دنتي وحشتيني
من لهفتي برجوعك دمعت عيني
نزلت دموع فرحتي والضحك هستيري
ياما دعيت ربنا الحرية دي تجيني 

عشاق ترابك يا مصر طلعو من جيلنا
شهد علينا الكون وفجرك يناديلنا
لبينا نداكي بسلم والغدر مش منا
احنا ولاد البلد فككنا سلاسلها


مطلبناش سلطه ومال وقلنا الريس يتشال
مش عيزين الطوارئ ولا التوريث لجمال
وحكومه نظيف تتغير و تبقي عال العال
وعز الطبــال فلوسنا من خزنته تتشال


ليه يابو كاب ودبوره نسيت أصلك وبقيت صوره
مرمغت اخوك في دمه عشان العادلي أبو قوره
نشنت في المليان بحجات في الدنيا محظوره
وكملنا في الميدان دي مصر  فالقلب محفوره 


رجعتي بدم غالي بقا اطول من نيلك
دم الشهيد العالي عطر بساتينك
واحنا أسود حالفين عالظلم نقضيلك
والكل في التحرير بقلب واحد يصليلك


خدينا فحضنك بقا وانسي سواد ليلك
بإيد وحده كلنا حنعمر ونبنيلك
قلت انا المصري وزلزلت زلازيلك
عشقك مكتوب علينا في قرآنك وانجيلك
يا مصر انتي تشاوري واحنا ننحيلك

صباحك يـا مـصـر

صباحـك يـا مـصر بالورد ريحته معطره 
عـلى كــل شــاب فـيـكـي غـلـب عـنتـــره 
على ثوار أرضك مش عالناس اللي ف طره


صباحك برئ من غير غرور ولا منظره 
راحت خـلاص أيــام الفسـاد والمسخـره
وعـيـون الحـرامي فيها الدمـوع مقطره 


يفيد بإيه البكا دي ذنوب في كتب متسطره
ولسه فلوسهم على المساجين متنطوره !!
يــاعم كفـايــــه بقــا نفخـه كدابـه ومنظـره


زمــان اتقـال للمعتقليـن قولـوا أنـا مــره
والنهـارده عرفوكم إيه أصـول المـرجله
خـلاص فــات وقــت الأسـف والمـعـذره


مالك يا مخلوع خايف صحيح من البهدله ؟
بيقولوا داخل في اكتئاب وانتحار ومهزله
بس لو فـكرت تهـرب حنقلبهـالك مجــزره


عشان دم الشـهـيد حتبقى نهـايتك مقـبـره
ونخـلي عيلتـك شمـال ويـميـن متنطــوره
روح نــور حـبـايبـك فـي سـجــــن طـــره