Follow by Email

سلامات يا حكومه


في البدايه حبيت أمسي على حكومتنا الغاليه وأقول سلامات يا حكومه يا اللي عيزه استقرار بلدنا من شرقها ل غربها .... سلامات يا حكومة يا حنينه على الغلبان  وبتصرفي المعاشات في وقتها ...... سلامات يا حكومه ياللي بتقتلي ثوارك البلطجيه قبل ما يخربوها ويقعدو على تلها ........ سلامات يا حكومه يا اللي بتصالحي أم  الشهيد بالديه وكأنها هديه من ابنها  

ومبروك البراءه لكل رجل طاهر وحيفضل طول عمره طاهر .....مبروك للفقي وغالي وفضلي والمغربي وعقبالك يا ريس ...... أيوه بقول يا ريس مهو لسه مشرفنا بس راح يصيف وسلم الراية عشان يواصل حدوته ابو الفساد

عملنا ثورة هزت العالم وعلمناهم يعني ايه سلميه وحريه وكرامه ولكن في مصر بس ممكن تلاقي ثوره تبهر العالم كله ومتعترفش بيها داخليتنا ولا حكومتنا .....سلامات يا حكومه

قلنا تغيير وادينا غيرنا  .... شيلنا مبارك وجيبنا مشير...... شيلنا نظيف وجيبنا شرف  ....شيلنا العادلي وجيبنا العيسوي  ، ده حتى الداخليه بدأت تتغير وظهر فيها راقصه لولبيه متعدده المواهب بترقص بالسيوف مكانتش موجوده قبل الثوره... من القسم للكباريه ومن الكباريه للقسم

لكن الحق يقال لسه كلاب الداخليه متغيروش وشفت ده في فيديو حرب الداخليه مع الثوار لدرجه اني لما شفت الفيديو بصيت في التاريخ كويس لأني شكيت ان المشاهد دي تكون قبل الثوره وقلت مستحيل تكون بعد 25 يناير بس للأسف كانت هي دي الحقيقه !!!

يعني ايه نعمل ثوره في عيد الشرطه ويبقى لسه في تجاوزات وتعذيب من الشرطه ..... يبقى التكرار يعلم الحمار ولازم ننزل تاني عشان يتعلمو الدرس
 والجديد ان المرادي الانتهاكات عليها عرض مغري .... الداخليه وعليها الشرطه العسكريه هديه حتى اسألوا لؤي نجاتي واللي معاه لأنهم جربو العرض ده ولقو نفسهم واقعين في عصابه وبيتسلمو تسليم اهالي

لؤي نجاتي كل اللي عمله إنه صور إنتهاكات الشرطة زي أي حد فينا وكان مصيره التعذيب هو واللي معاه ومنهم طفل عمره 16 سنه ميستحملش ألم منهم ومع ذلك مترحمش ...... تعذيب ؟! تااااني ؟! أمال ثوره ايه اللي عملناها ؟؟ وحقوق إنسان إيه اللي بنطالب بيها ؟؟ سلامات يا حكومه 

ليا صديق صحفي لما لقاني بحب التصوير والنشر من خلال الصحافه الإلكترونيه عرض عليا يطلعلي كارنيه صحافه وينشر شغلي في المجله وقالي الكارنيه حينفعك في أي مكان ...... بس انا رفضت وقلتله اني مستقله وان زمن الكارنيه انتهي ومش عيزه الكارنيه هو اللي يحميني بعد ما عملنا ثوره ولما رجعت البيت عرفت اللي حصل ل لؤى لما الظابط سأله انت صحفي يلا ؟؟ ولما قاله لا اتضرب واتعذب وكان ممكن كارنيه زي ده يحميه منهم .....الله ؟! يعني احنا لسه في زمن الكارنيه اهو ... وانا وانت واي حد فينا ممكن يحصله اللي حصل ل لؤي وهو بيصور ... سلامات يا حكومه


الثوره بدأت ومكنش صح نسيب الميدان بس لسه اللجام في ايدينا وحنرجع نعتصم زي ما بدأناها ب اعتصام وحنرجع نقول عيش حريه كرامه إنسانيه ...... ومحدش حيقول الدستور أولا ولا الانتخابات أولا ولكن ..... مـــــصــر أولا
 وكفايه كده على الحكومه

ليست هناك تعليقات:

إرسال تعليق