Follow by Email

في حب ماريه




أنـا العاشق أنـا الولهـان 
وعلى بابك مرمي رِمِيّه

أنا الدرويش وغيري مفيش
يوصـيكي مليــون وصـيّه

تـضميني لمـوج عـــالــي 
في حضنك الدافي يا ماريه

أنا شطك ، ريحه بحـرك
وضحكـة شمسك للميّــه 

انا اللي الذكرى وخـداني
وعشقي باقي في الحته ديّه

ولما الدنيـا بيا تضيــــق 
تكون إيدك ممدوده ليّـه

يلاغيني موجك الملفوف
اكلـم فيـه ويـرد عليّـه

وفي ثانية هواكي يسطلني
ينسينـي الـدنيــا ديّـــه

أنا الدايب في سواد الليل
على خصر أجمل صبيّه

أنا الولهان في كحل عيون
طلّين من برقـع حوريّـة

أنا شباكك في بحـر كبيـر 
من سيدي بشر للمنشيـه

أنا الثـائر في ميادينـك
واللي ظلمك ملوش ديّه

أنـا رنـه لخـلخـالــك
على الكرنيش فالمغربيه

أنا مطَره بيكي مجنونه
في أجمل ليلـه شتـويـه

أيوووه يا عالم على ليلـه
تعيشها في حضن إسكندريه