Follow by Email

حلم اتسرق

حلمت بيكي صبية لابسة توب الفرح 
ايدك في إيديا وكأني مــــالك الـكـون
عاشق ملامحك وبضحكة قلبي انشرح 
في قمة النشوه وبيكي انــا مجنــون 



حلمت وانا معاكي سابقين اوي قدّام 
وبكره جاي جديد بميت ألــف لـون 
وابنى على ايـدك بيتهجى الكــــلام
بحبك يـا مـصر وعمرى ما أخون



فجـأة ! صحيت من أحلى منــام 
على خونة مستخبيين ورا الدقون 
سرقوا الحلم وماعليهومش ملام
ما اتعلموش يحلموا أيام السجون 



الحلم الجميل بقا قصاقيص ورق
والشمعة بدأ نورها العالى ينطفي
أعنف خناقة بتبقى على حلم اتسرق
ويا احنا يا انتوا حـد لازم يختــفي 



طول ما فينا روح حنفضل نفتكر 
دم وعرق اتدفعوا طول الطريق 
نازلين نعيش مش نازلين نحتضر
والأمـــل جوانا يمحي أي ضيــق



حسن ودومة الاحرار في الحبس 
الملك بقا كتابة والميزان مقلوب 
نازلين نعلم الإخوان أهم درس 
مش شعب مصر اللي يبات مغلوب 



مكملين مشوارنا والمره دي بقلق 
ملايين حتثور ومش حتشوفوا نوم
مين ده اللي يمنع سفينه الحق تنطلق 
الإخوان راكبين فلايك والثوار واخدينها عوم ؟



ارحل بدون وعود كدابه وبل ريق 
كداب ولو تحلف على الختمة 
اللي قتلته كان اغلى صديق
والله لترجع للسجون وللعتمة



لو فاكر ان الحلم اتقتل يبقى اتهبل 
الحلم عايش جوانا ولسه بيترسم 
بروح الثوره وجمرها بيشتعــل
وقدام نظامكم لسه قادرين نبتسم